قصة مثل (لاحظت برجيلها ..ولاخذت سيد علي)

هلو حبايب
واحلى اعضاء
شلونكم ان شاء الله كلكم بخير



اليوم راح احجيلكم قصة كلش حلوه اني من زمان جنت اسمع من بيبيتي هذا المثل بس ما اعرف شنو قصته واليوم عرفتها وحبيت انقلها الكم
ان شاء الله تعجبكم

هذا المثل يضرب للشخص اللي يعوف اللي بيده واللي يطمع بالحصول على مل هو افضل منه وبالتالي ما يحصل لا على اللي جان يطمع بيه ولا حافظ على اللي بيده ويخسر هذا وذاك ويضوك وبال امره وعاقبة طمعه.....


القصه تكووووول

جانت اكو مريه كلش كلش حلوه فاتنه بالجمال وطاهره وعفيفه هاي المريه زوجوها لرجل فقير كلش ورزقه هم كلش قليل بس هذا الرجال الفقير جان يموووت عليها ودائما جان يحرص ويحاول يخليها مرتاحه وتعيش سعيده باللي تسمح بيه حالته يعني على كد حاله المهم مرت سنين على زواجهم هاي المريه الشيطان كام يوسوس براسها ملت عيشة الفقر ويه زوجها ونفرت من العيشه وياه راحت تدور على فتاح فال يشوفلها حظها وين يكعد وحظ رجلها يعني بين قوسين (يكشفلها) طبعا هاي حسب عقليتها ويشوفلها شنو مستقبل حياتها ويه زوجها المهم دلتها النسوان على واحد اسمه الملا سيد علي هذا جان مشهور بقراءة الفال هيه هم ما صدكت راحت لسيد علي ...هذا سيد علي شاف شكلها يخبل وحليوه زاغت عينه عليها قرر يستحوذ عليها لنفسه المهم جذب عليها شويه حسبلها النجوم وساللها ملك الجن بعدين كللها تره النجم مالتج ومال زوجج ما يتوالمون والطلاق من زوجها هو خير ما تكدر تسويه ولو الطلاق هو ابغض الحلال عند الله... بس هو بحجيه لمحلها هو مستعد يتزوجها ويسعدها وره ما تطلك من رجلها وتكمل عدتها هاي هم الغبره حشاكم صدكت بيه وثقت بكلامه رجعت لزوجها وطلبت منه الطلاق غصبا ما على خشمه هو هم كام وطلكها وكامت رجعت لسيد علي حتى يوفي بوعده وياها ويتزوجها هذا سيد علي كام يماطل بالموضوع واليوم والباجر واصبري بعد لحد ما حست بمكره والخدعه مالته وعرفت هو ابد ما راح يتزوجها رجعت لزوجها القديم تبجي وتتعذر وتتاسف وطلبت منه يعيدها لعصمته مره ثانيه هذا الرجال بالرغم من فقره بس جان عنده اباء وعزة نفس وشيم مقبل يرجعها تاليها رجعت لاامها تدك وتطلم وتبجي وعاشت ويه امها وقاسمتها قسوة الفقر واهوال الفاقه ..الناس سمعوا بهاي السالفه وكالوووو ياااااا هاي لا حظت برجيلها ....ولا خذت سيد علي...ولا موها على سوء تصرفها وعدم قناعتها بما قسمه الها رب العالمين من الرزق ...وهسه صارت هاي السالفه مثل..


اتمنى عجبتكم القصه
مع تحياتي